إلى كل شهيد رافض حياة
إلانكسار
الي كل شهيد مولود على إيده
النهار
عبد المنعم رياض
الحزن زي السمك لازق
في قعر البحر
ومافيش أحزان بتهوي
الإنقراض
والفرح زي الطفل بيتولد
زي العجين من غير مخاض
مضمض فؤادك وإمشي عكس الريح
تلقى السواد نايم في أحضان البياض
فضفض جيوبك م الذنوب وإبتسم
مين في البلدي زي عبد المنعم رياض
واخر نظرة عالجبهة
بعتهالي في ظرف جواب
عيونه زي طبق النور
بتتمرجح في حضن سحاب
ملامح قلبك البيضا شايفها
ليس محفورة في قلب الباب
وحتى الصبح زي الورد
مشتاق لك
بيهمس همس على ضيك
وريحة عطرك الفواحة
نغم ساكن تابوت في تراب
يا عايش زي الزمن الحي
وصوتك فانوس رمضان
مولع شمعة في الضلمة
ودمك زي الربيع
شجر طارح على الرملة
بتاخد روحنا وعيالنا لأحلى حياة
حلاوة قلبك المعسولة
وحب الوطن ده احلى علام
صغار وإحنا إتعلمناه
في سنة أولى
بنتهحي حروفك نور
نفرق صورك على الدكاكين
وحتى الرمل ويانا مع الياسمين
بيهتف مصر
بيهتف للشهيد الحي
يقول يا رياض
الإسم عبد المنعم رياض
فارس فوق الحصان
والركَ ع التفاصيل
فيه ناس ملايكه بجد
وناس مشاعرها زي البدل
متفصلة تفصيل
الأوله عبد
كلنا عبيد للحق الواحد
الصمد في علاه
المنعم
أنعم علية الخالق بين الورى
إصطفاه
رياض
وفي الروضة الشريفة
أوله و منتهاة
الفجر حالف ليأخر طلوعة
اليوم كام ساعة
مات الشهيد ابو قلب
ابيض من البياض
مين اللي مات ياجدع في البلد
قالوا الفتى الذهبي رياض
يا حضن مصر الساهر
يا قلبها الموجوع
البحر يبكي والسمك
وما فيش مراكب قادرة تشيل الدموع
ولا أقمار صناعية تقدر تصور
جسر المحبة بينك وبين ربك
يابو دم سال على الكنال
يا صوت مصر وشعبها
نايم في حضنك
بارليف ايلات يانسر فوق الممكنات
حتى النفق زي النخيل
فرحان باسمك
فية روح تعيش
ذكراها حي في كل عام
طول السنين
وروح يادوب
القلب يبكي عليها
دمعة او دمعتين
صوت المدافع
وهيا طالعة تفرش بيبان الأمل
على أمة نايمة
كل التلامذة حتى الأساتذة
بتقول رياض
ورمل سينا بيبتسم
ساعة رجوعة وضحكتة
لحضن مصر
بيقول رياض
صوت المكن والمسطرين حتى
الشاكوش
كل الشوارع حاضنة صورتك
يوم موكبك
صوت الزحام طالع معانا
وكل مصر واقفة تبكي
تودعك
بتقول رياض
الشاعر /رضا البوشي
